John 6

Yesu vet xomxo 5000

(Matyu 14:13-21 Mak 6:30-44 Luk 9:10-17)

1Yesu nêl kɨyang tige vêl dɨ tô mɨ sox la mia Galili vɨlu ganê. Mia tige lê ngwe nêbê Taibilias. 2Mêd xomxo tɨbeac hɨwocên tɨmu vô Yesu vɨxa mɨ la, ên he yê do levac wê Yesu vông xomxo yidac vô nivɨha lec ge. 3Mêd Yesu he nue ngɨvihi lec kɨtôn ti mɨ la dô lec. 4Mêd buc ngɨbua wê Yuda** ob yê Pasova** ên xovô buc wê he sea Isip ilage vô kwabo lec. 5Lêc Yesu yê xomxo tɨbeac val om nêl vô Pilip ên nêbê, “Il ob kɨsuu blet gê na mɨ vet xomxo tigae ya?” 6Yesu xovô môp wê nêb ob vông ge pyap, lêc nêl kɨyang tige vô Pilip ên nêb ob yaxên i.

7Mêd Pilip nêl vô i ên nêbê, “Il obêc kɨsuu blet lec mone yul yuu (K200) mɨ vông nipwo tyatya vô he ge od yaên tige obêc tɨyi he vɨhati lêm.” 8Mêd nue ngɨvihi ngwe lê nêbê Andlu, wê Saimon Pita li ge

nêl ên nêbê, 9“A xê xomxo nipwo ti wê kô blet vɨgê vɨlu dɨ beac yuu, lêc yaên tige o tɨyi xomxo tɨbeac tigae lêm.” 10Mêd Yesu nêl ên nêbê, “Xam vông xomxo vɨhati i tô mɨ dô kɨbun lê.” Vɨgwe tige hɨsinac nivɨha dô om he dô kɨbun lec. Xomxo tigee tɨbeac hɨwocên om vux vaci tɨyi xocbê 5000.

11He dô kɨbun pyap mêd Yesu hôm blet tige dɨ kɨtaa lec mêd tɨtang vô xomxo vɨhati. Nang dêc vông bêge vô beac hɨxôn, mêd xomxo vɨhati ya dɨ i den he. 12He ya pyap, mêd Yesu nêl vô nue ngɨvihi ên nêbê, “Xam vɨlu myapɨpu wê he ya dɨ i dô gee mɨ tung i dô kɨdu ti, ên ti i o loc dô sea lêm.” 13Mêgem he kɨtuc myapɨpu wê xomxo ya dɨ i dô gee mɨ su vac sepac vɨgê yuu dɨ tô mɨ la yuu mɨ i pup lec.

14Xomxo tigee yê do levac wê Yesu vông ge om nêl ên nêbê, “Plopet ti wê he nêb ob lam kɨbun ge, tyo tiga vɨxôhɨlôg nôn.” 15Mêd Yesu xovô wê he nêb he ob hôm i xôn dɨ vông i tu he nên king ge, om sea he dɨ ici va lax mɨ la lec kɨtôn.

Yesu la lec mia luaên kɨsii

(Matyu 14:22-33 Mak 6:45-52)

16Vɨgwe huc dɨ Yesu nue ngɨvihi lop mɨ la mia luaên nɨnya, 17dɨ lec la lec dipac ti dɨ la, ên nêb ob lax mɨ la Kapaneam wê yêp mia luaên vɨlu ganê. Dɨ vɨgwe buc lêc Yesu o mɨla vô he decdec lêm. 18Mêd lea levac ti val om vông mia vô mahɨlevac xocbê ob kɨpyax he vac, 19om he hɨsoo mia mɨ la mahɨgun dia tya tɨyi xocbê 5 kilomita ge, lêc he yê wê Yesu lam lec mia kɨsii mɨ val kwabo vô dipac ge om he xonamabu. 20Lêc Yesu nêl vô he ên nêbê, “Ga a, om xam xona ên i ma.” 21Mêd he nêl vô Yesu ên nêb i lec lam lec dipac, dɨ lutibed dipac mɨla le kehe vô vɨgwe ti wê he nêb he ob la ge.

Xomxo tɨbeac myag Yesu

22Vɨgwe vɨdiiên tɨtige, xomxo tɨbeac gên dô vô mia luaên nɨnya vɨlu ganê dɨ dô bin Yesu, ên he xovô ên he nêbê dipac tibed sea vɨgwe tige vɨhevage dɨ la, dɨ Yesu nue ngɨvihi heche va la lec dipac tige dɨ Yesu o la hɨxôn he lêm. 23Mêd dipac mangwe lam gê vɨgwe Taibilias dɨ lam le vô vɨgwe ti wê Apumtau Yesu kɨtaa lec blet mɨ xomxo ya vɨhevage. 24Mêd xomxo tigee yê lêc Yesu he nue ngɨvihi o dô lêm om he la lec dipac ti dɨ la ên nêb ob la myag Yesu gê Kapaneam.

Yesu ge yaên wê ob vông xomxo dô mavɨha

25Xomxo tigee mɨla yêvô Yesu gê mia luaên vɨlu ganê dɨ kɨnêg vô i ên nêbê, “Xolac kehe, ông lam ga yelacna?” 26Lêc Yesu nêl vô he ên nêbê, “A nêl hɨxôn nôn vô xam bê xam myag a, lêc xam o xovô do levac wê a vông ge lêc lam myag a lêm. Nge, xam xovô blet wê xam wa i den xam ge om xam lam myag a. 27Le i lêc vông yuac levac ên yaên wê ob vô nipaên ge lêm. Nge, xam vông yuac lec yaên wê xam ob kô dɨ dô mamvɨha luta ya ge. Yaên tige, a, Xomxo Nu**, a obêc vông vô xam, ên Mag Anutu vɨnoo a pyap ên nêb a vông i yuac.”

28Om he nêl vô i ên nêbê, “Xe ob vông Anutu yuac ga tibêna?” 29Om Yesu luu he vya bêga nêbê, “Yuac wê Anutu vông ge bêga bê xam vông i vin xomxo ti wê Anutu vông i lam ge.”

30Mêd he kɨnêg vô i ên nêbê, “Om ông ob vông do levac tina ên xe xê dɨ vông i vinê? Ên buge ilage ya yaên mana vac vɨgwe mahɨgun pɨleva, tɨyi xocbê kɨyang wê yêp vac xolac bêga nêbê, ‘Ici va vông yaên lag puunê vô he mɨ he ya.’ Om ông ob vông do levac tibêge, me?” 32Lêc Yesu nêl vô he ên nêbê, “A nêl vɨxôhɨlôg nôn vô xam bê Moses o vông yaên lag puunê vô xam lêm. Nge, Mag vaci wê vông yaên nôn lag puunê vô xam ge. 33Yaên wê Anutu vông ge, lam gê lag puunê dɨ lam vông xomxo kɨbun ga dô mavɨha.” 34Om he nêl vô i ên nêbê, “Xomxo levac, ông vông yaên tige vô xe i tɨyi buc vɨhati ên va.”

35Om Yesu nêl vô he ên nêbê, “Aca va ga, a yaên wê ob vông xomxo dô mavɨha ge. Xomxo ti obêc lam vô a ge od vip obêc den i tii vac nang lêm, dɨ xomxo ti obêc vông i vin a ge od obêc xo mia ti i tii vac lêm. 36A nêl gwêba vô xam ên a nêbê xam wê a pyap lê, lêc xam o vông i vin lêm. 37Xomxo wê Anutu vɨnoo nêb he i tu axe ge, vɨhati obêc lam vô a, dɨ xomxo ti obêc val vô a ge, od a obêc tii i lêm. 38Ên a o lop mɨ lam gê lag puunê ên a nêb a ob vông i tɨyi xovôên wê aca va vông ge lêm. Nge, a lam ên a nêb a ob tɨmu vô kɨyang wê xomxo ti wê vông a lam ge nêl ge. 39Xomxo ti wê vông a lam ge nêb a o lêc sea xomxo wê i vɨnoo nêb he i tu axe ge ti i dô xel lêm. Nge, nêb a lêc tɨpi vô he vɨhati i kɨdi lec vô buc tɨmuên. 40Ên Mag nêl kɨyang yêp bêga nêbê xomxo wê yê nu tuc dɨ vông i vin ge, he vɨhati obêc dô mavɨha luta lêc luta, dɨ a obêc tɨpi vô he kɨdi lec vô buc tɨmuên.”

41Mêd he Yuda ngô kɨyang wê Yesu nêl ên nêbê, “Aca va yaên wê a lop mɨ lam gê lag puunê,” om he kunac i dɨ nêl kɨyang ni nyagên lec i 42dɨ nêl ên nêbê, “Xomxo tige Yesu wê Josep nu ge, dɨ ta yuu ma il xovô. Bêna lêc nêl ên nêbê i lam gê lag puunê?”

43Lêc Yesu nêl vô he ên nêbê, “Le i lêc ngaênma lec a lêm. 44Ên xomxo ti o tɨyi wê ici va ob lam tɨmu vô a ge lêm. Mag wê vông a lam ge obêc dɨdii xomxo ti ge od obêc lam tɨmu vô a, dɨ a obêc tɨpi vô i kɨdi lec vô buc tɨmuên. 45Kɨyang yêp vac kɨpihac wê plopete kɨvuu ilage bêga nêbê, ‘Anutu ob tɨxuu xomxo vɨhati.’ Om xomxo vɨhati wê ngô Mag kɨyang dɨ kô xovôên vô i ge ob lam vô a. 46Ên xomxo ti o yê Mag lec manôn lêm. Nge, a wê a lam vô Anutu ge a tibed wê a xê i. 47A nêl hɨxôn nôn vô xam bê xomxo wê vông i vin ge obêc dô mavɨha luta lêc luta. 48A ga, yaên wê ob vông xomxo dô mavɨha luta. 49Bume ilage wê ya yaên mana vac vɨgwe mahɨgun pɨleva ilage, he ya lêc yib. 50Lêc yaên wê lam gê lag puunê ge, xomxo ti obêc ya ge od ob yib lêm. 51A ga yaên mavɨha wê a lop mɨ lam gê lag puunê. Om xomxo ti obêc ya yaên tiga ge od ob dô mavɨha luta lêc luta. Yaên wê a ob vông vô i ge, aca va lɨyôhô wê a ob vông, ên xomxo kɨbun ga i dô mavɨha.”

52Mêgem Yuda ngaênma lec kɨyang tige dɨ nêl vôma ên nêbê, “Xomxo tige obêc vông i lɨyôhô mɨ il xa tibêna?”

53Om Yesu nêl vô he ên nêbê, “A nêl hɨxôn nôn vô xam bêga bê xam obêc wa a, Xomxo Nu**, lɨyôhô dɨ num a hi lêm ge od xam ob dô mamvɨha lêm. 54Xomxo wê ya a lɨyôhô dɨ num a hi ge, he ob dô mavɨha luta lêc luta, dɨ a obêc tɨpi vô he kɨdi lec mavɨha vô buc tɨmuên. 55Ên a lɨyôhô tu yaên nôn, dɨ a hi tu mia numên nôn. 56Xomxo wê ya a lɨyôhô dɨ num a hi ge, he ob dô vac a nɨlôg dɨ a ob dô vac he nɨlô. 57Mag mavɨha vông a lam, dɨ a dô magvɨha ya xêkɨzêc wê Mag vông ge. Om xomxo ti obêc ya a ge, od ob dô mavɨha ya xêkɨzêc wê a vông ge. 58Tiga, yaên wê lam gê lag puunê ge, lêc o tɨyi xocbê yaên wê bume ya ila ila lêc yib ge lêm. Nge, yaên tiga wê xomxo obêc ya ge od ob dô mavɨha luta lêc luta.” 59Yesu nêl kɨyang tige vô xomxo vac Yuda** xumac lɨlo gê Kapaneam.

Yesu ge kɨyang mavɨha dôên kehe

60Xomxo wê mi la hɨxôn Yesu gee he tɨbeac ngô kɨyang tige wê Yesu nêl ge, om he nêl ên nêbê, “Kɨyang tiga vɨyin levac, om letya tɨyi wê ob ngô ge?” 61Yesu xovô wê he nêl kɨyang tɨbeac tɨbeac lec tige om nêl vô he ên nêbê, “Kɨyang tige juda xam, me? 62Xam obêc wê Xomxo Nu lax mɨ la vac vɨgwe ti wê dô vac ilage ge od xam obêc xo bêna? 63Myakɨlôhô Ngɨbua tibed wê ob vông xomxo dô mavɨha, dɨ xêkɨzêc wê xomxo vông ge ti o tɨyi lêm. Kɨyang wê a nêl vô xam ga ge, a nêl lec Myakɨlôhô Ngɨbua wê ob vông xomxo dô mavɨha ge. 64Lêc xam ya o vông i vin lêm.” Yesu nêl bêge, ên ilage Yesu xovô xomxo wê vông vinên obêc ma ge, dɨ xovô xomxo tya wê ob vông i vac tɨbii vevac vɨgê ge pyap. 65Mêd Yesu nêl ên nêbê, “Kɨyang yêp bêge, om a nêl gwêba vô xam ên a nêbê xomxo ti o tɨyi wê ici va ob lam tɨmu vô a ge lêm. Mag obêc vông xêkɨzêc vô i ge od obêc lam vô a.”

66Yesu nêl kɨyang tige pyap mêd xomxo wê mi dô hɨxôn i ge tɨbeac sea i dɨ o dô hɨxôn i tii vac nang lêm. 67Om Yesu kɨnêg vô nue ngɨvihi vɨgê yuu dɨ tô mɨ la yuu ên nêbê, “Dɨ xacxam va ob sea a êno dɨ la mê?” 68Lêc Saimon Pita nêl vô i ên nêbê, “Apumtau, xe ob la vô letya? Ên kɨyang wê ông vông ge wê ob vông xomxo dô mavɨha luta lêc luta. 69Om xe vông i vin dɨ xovô ên xe nêbê ông ge xomxo ngɨbua wê Anutu vông ông lam ge.”

70Mêd Yesu nêl vô he ên nêbê, “A vɨnoo xam vɨgê yuu dɨ tô mɨ la yuu, lêcom xam ti tu Seten xe.” 71Yesu nêl kɨyang tige lec Judas wê Saimon Iskaliot nu ge. Ên Judas ge he vɨgê yuu dɨ tô mɨ la yuu ge ti, wê ob nêl Yesu kɨtong vô tɨbii vevac ge.